මාධ්‍ය නිදහස කබලෙන් ලිපට

ජාතිවාදී ලේබල් අලවමින් මාධ්‍ය මර්දන කරන බවට
අගමැති කරන තර්ජන හෙළා දකිනවා

– ප්‍රසන්න රණතුංග

ජාතිවාදී ලේබල් අලවමින් මාධ්‍ය මර්දනය කරන බවට අගමැතිවරයා කරන තර්ජන හෙළා දකින බව බස්‌නාහිර පළාත් මහ ඇමැති ප්‍රසන්න රණතුංග මහතා නිවේදනයක්‌ නිකුත් කරමින් කියා සිටී.

එම නිවේදනයේ මෙසේද සඳහන් වේ.

එක්‌ අතකින් තොරතුරු දැන ගැනීමේ පනත ගෙන එන බව පවසමින්, අනෙක්‌ පැත්තෙන් මාධ්‍යවේදීන්ට හා මාධ්‍ය ආයතනවලට තර්ජනය කිරීමෙන් යහපාලන ආණ්‌ඩුවේ අගමැති රනිල් වික්‍රමසිංහ මහතාගේ සුපුරුදු දිව දෙකේ ප්‍රතිපත්තිය හෙළිවන බවද ඔහු පෙන්වා දෙයි. ආණ්‌ඩුව ගෙනෙන තොරතුරු දැනගැනීමේ පනත ව්‍යාජ එකක්‌ බව එමගින් තහවුරු වන බවද රණතුංග මහතාගේ අදහසයි.

දිවයින, රිවිර, ඉරුදින වැනි පුවත්පත්වල නම් පවසමින් එහි කර්තෘවරුන්ගේ නම් සඳහන් කරමින් වික්‍රමසිංහ මහතා කරන තර්ජනය යහපාලන ආණ්‌ඩුවේ මාධ්‍ය නිදහසට එල්ල වූ මරු පහරක්‌ බවද රණතුංග මහතා පෙන්වා දෙයි.

කුරුණෑගලදී ඔහු කළ මෙම ප්‍රකාශය පුරාම ඇත්තේ ද්වේශය මිස අන් කිසිවක්‌ නොවේ. මෙම මාධ්‍ය “රාජපක්‍ෂ වැසිකිළි හෝදන සක්‌කිලි වැඩේ” කළ බව පවසා ඇති වික්‍රමසිංහ මහතා “දිවයින” කර්තෘ අනුර සොලමන්, දිවයිනෙන් ඉවත් විය යුතු බවට තර්ජනය කර තිබේ. වික්‍රමසිංහ මහතා මාධ්‍යය හිමිකරුවන් සහ කර්තෘවරුන් ඉදිරියේ දී කැඳවන බවත්, එම

රැස්‌වීමට කවුරුන් හෝ නොආවොත් තමන් ඒ ගැන එදාට බලා ගන්නා බවත් සඳහන් කර ඇත්තේ යහපාලන ආණ්‌ඩුවේ අගමැතිවරයා වශයෙන් නොවන බව රණතුංග මහතාගේ අදහසයි.

ඔහු මෙම තර්ජනය කර ඇත්තේ තුම්මුල්ලේ පද්මේ වැනි පාතාල නායකයකු ලෙසින් බවද රණතුංග මහතා පෙන්වා දෙයි.

පසුගිය රජය සමයේ මාධ්‍ය නිදහස නැතැයි කියමින් කෑමොර දුන් ආණ්‌ඩුව සංවිධාන හා පුද්ගලයන් මේ සම්බන්ධයෙන් නිහඬ ප්‍රතිපත්තියක්‌ අනුගමනය කරන්නේ ඇයි දැයි ප්‍රශ්න කරන රණතුංග මහතා ඔවුන් නිහඬව සිටින්නේ

ලැඡ්ජාවටද, එසේත් නැත්නම් මෙවැනි තර්ජන අනුමත කිරීම නිසාද යන්න පිළිබඳව ප්‍රශ්නයක්‌ මතුවන බවද කියා සිටී. හැකි නම් අගමැතිවරයාගේ මෙම මැර ප්‍රකාශයට එරෙහිව උද්ඝෝෂණය කරන ලෙස එම සංවිධානවලට අභියෝග කරන්නේ යෑයිද රණතුංග මහතා කියයි.

දැන් තමන් මෙම නිවේදනය නිකුත් කළ වහාම යහපාලන ගැත්තෝ මහින්ද රාජපක්‌ෂ ආණ්‌ඩුව සමයේ සිදුවූයේ යෑයි කියන ඇතැම් සිද්ධීන් හුවා දක්‌වමින් ප්‍රකාශ නිකුත් කිරීමට ඉඩ තිබේ. රනිල් වික්‍රමසිංහගේ මේ යහපාලන ආණ්‌ඩුව පත් කෙරුණේ පැවැති රජය විසින් සිදු කළේ යෑයි කියන වැරැදි හෝ අඩුපාඩු ඇත්නම් වෙනත් පුද්ගලයන් විසින් ඒ ආකාරයෙන්ම එම වැරැදි සිදු කිරීමට නොවේ. යහපාලනයෙන් ජනතාව අපේක්‍ෂා කරන්නේ නිවැරැදිම දේ සිදු කිරීම බව රණතුංග මහතා පෙන්වා දෙයි. එහෙත් අද වන විට ජනතාවගේ යහපාලන අපේක්‍ෂාවන් එකින් එක බිඳ වැටෙමින් තිබෙන බවත් රනිල් වික්‍රමසිංහ අගමැතිවරයා මාධ්‍යවලට කළ තර්ජනය ඊට කදිම නිදසුනක්‌ බවත් රණතුංග මහතා අවධාරණය කරයි.

රනිල් වික්‍රමසිංහ මහතාගේ මෙවැනි තර්ජනය කිරීම් මීට පෙර අප දැක ඇත. එම තර්ජනයන්ගෙන් පසු සිදු වූයේ කුමක්‌දැයි අපි හොඳින් දනිමු. එබැවින් අගමැතිවරයා මුද්‍රිත මාධ්‍ය කිහිපයක හා මාධ්‍යවේදීන් කිහිප දෙනකුගේ නම් කියමින් කළ තර්ජනය මෙරට මාධ්‍ය නිදහසට එල්ල කළ බරපතළ තර්ජනයක්‌ බවත් අගමැතිවරයා මාධ්‍යවේදීන්ගේ නම් පවසමින් කළ එම ප්‍රකාශය දැඩි පිළිකුලෙන් හෙළා දකින බවත් රණතුංග මහතා අවධාරණය කරයි.

 

http://www.divaina.com/2015/02/25/news27.html

Advertisements